Samtök hernaðarandstæðinga efndu til opins félagsfundar í Edinborgarhúsinu á Ísafirði sl. laugardag. Um tuttugu manns mættu á fundinn, hlýddu á framsögu formanns samtakanna og tóku þátt í líflegum umræðum.
Alllangt er liðið síðan SHA sendu síðast fulltrúa vestur, en hernaðarandstæðingar á Ísafirði hafa þó haldið út nokkru starfi síðustu misserin. Ljóst er að til mikils er að vinna að samtökin geri stórátak í fundarhaldi af þessu tagi. Hlýtur því að verða beint til nýrrar miðnefndar SHA að gera þar bragarbót - en hún verður að sjálfsögðu kjörin á landsráðstefnu í Friðarhúsi næstkomandi laugardag.
